DAP khaad Pakistan aur India mein sab se zyada istemal hone wali chemical khaadon mein se ek hai. Yeh khaad faslon ki growth barhati hai aur zameen ko zaroori ghizaiyat faraham karti hai. Is article mein hum DAP khaad ke fayde, nuqsanaat aur istemal ka sahi tarika tafseel ke sath parhen gay.

DAP Kya Hai?

DAP (Di-Ammonium Phosphate) ek khaad ka naam hai. Yeh ek mashhoor chemical khaad hai jo zameen ki zarkhaizi barhane aur faslon ki paidawar (production) mein izafe ke liye istemal ki jati hai.

Yeh khaad Nitrogen (N) aur Phosphorus (P) ko mix karke banai jati hai. Yeh dono hi faslon ki sehat aur un ki achi nasho-numa ke liye bohot zaroori hote hain.

DAP Khaad Ko Istemal Karne Ka Tarika

Aap DAP khaad ko neeche bataye hue tareeqon mein se kisi ek tareeqe ke mutabiq istemal kar sakte hain.

1. Beej Bone Se Pehle

Is tareeqe mein beej bone se pehle zameen ko tayar karte waqt DAP khaad ko mitti mein mila diya jata hai. Is se podon ki jarren shuru se hi mazboot ho jati hain.

2. Beej Ke Sath

Is tareeqe mein DAP khaad ko beej bone ke sath hi zameen par daal diya jata hai. Doosre alfaz mein, beej bone ke foran baad DAP khaad ko bhi daal diya jata hai ya khaad daalne ke foran baad beej ko bhi bo diya jata hai. Is se beej ko ugte hi ghizaiyat mil jati hai.

Note: DAP khaad ko beej ke qareeb daalna chahiye lekin beej ke sath bilkul touch na ho.

DAP Khaad Ki Miqdaar (Quantity) Kitni Honi Chahiye?

DAP khaad ki miqdaar fasal aur jagah ke hisaab se mukhtalif hoti hai. Aam tor ek 1 acre zameen ke liye DAP ki 1 bori (50 kg ki bori) istemal hoti hai.

Lekin is ko zaroorat ke hisaab se kam ya zyada kiya ja sakta hai. DAP khaad ka istemal hamesha zameen ki quality, pani ki dastiyabi aur fasal ki zaroorat ko dekh kar karna chahiye.

Note: Sahi miqdaar maloom karne ke liye aap mitti ka test karwa sakte hain.

DAP Khaad Ke Fayde Kya Hain?

1. Podon Ki Jarron Ko Mazboot Banati Hai

DAP khaad mein mojood Phosphorus podon ki jarron (roots) ko mazboot banata hai aur fasal ki growth ko tez karta hai.

2. Phalon Ka Girna Kam Karti Hai

Aksar jab fasal pakne ke qareeb ho to phal girna shuru ho jata hai. DAP khaad phalon ke girne ko rokne mein ahm kirdar ada karti hai.

3. Zyada Paidawar

DAP khaad ka istemal fasal ki paidawar ko barhata hai. Yeh khaad zameen ki zarkhaizi ko zyada arse tak barqarar rakhne mein ahm kirdar ada karti hai.

4. Fori Asar Karne Wali Khaad

DAP khaad mitti mein shamil hote hi apna asar dikhana shuru kar deti hai. Yeh khaad fasal ko foran ghizaiyat faraham karti hai.

5. Mukhtalif Faslon Ke Liye

DAP khaad ko gehun, chawal, makkai, kapaas aur sabziyon ke liye ek behtareen khaad mana jata hai. Is khaad ko mukhtalif faslon ke liye istemal kiya jata hai.

DAP Khaad Ke Nuqsanaat Kya Hain?

1. Zameen Ki Sehat Par Bura Asar

Bohot zyada DAP khaad daalne se zameen sakht ho jati hai aur “Organic Matter” kam ho jata hai.

2. Mehngi Khaad

Yeh ek mehngi khaad hai. DAP khaad doosri chemical khaadon ke muqable mein mehngi hoti hai.

3. Nuksan Deh Balance

Agar DAP khaad ko had se zyada istemal kiya jaye to zameen mein Nitrogen aur Phosphorus ka balance kharab ho sakta hai. Is se zameen mein mojood doosre anasir ki kami paida ho sakti hai.