Aloo (Potato) Lagane Ka Tarika | Sahi Waqt | Zaroori Dekh-Bhaal

 

Aloo Ugane Ka Mukammal Tarika

Agar aap baghbani (gardening) ka shoq rakhte hain aur apne ghar par taza sabziyan ugate rahte hain to phir aap ko aloo (potatoes) ugane ki zaroorat to zaroor parhe gi. Kyun keh is sabzi ke baghair aap ka baagicha aur kitchen dono na-mukammal hain.

Aloo lagane aur ugane ka kaam bohot mushkil nahin hai. Agar aloo ko sahi waqt aur sahi tareeqe se lagaya jaye to aap ko behtareen results mil sakte hain.

Aaiye, jaante hain keh aloo lagane ka aasan aur behtreen tarika kya hai aur aloo ugane ke baad is ki zaroori dekh-bhaal mein kya kya cheezein shaamil hain.

Aloo Ugane Ke Liye Zaroori Cheezein

1. Aloo Lagane Ka Sahi Waqt

Aloo ugane ke liye sab se zaroori cheez hai sahi waqt. Pakistan aur India jaise mumalik mein aloo lagane ka sab se acha waqt October aur November ke mahine hote hain. In mahino mein mosam thora thanda ho raha hota hai. Is ke ilawa, February aur March mein bhi aloo ko lagaya ja sakta hai.

2. Aloo Ka Sahi Beej (Seed)

Aloo ke sahi beej ka intekhaab karna bhi bohat zaroori hota hai. Aap ko bazar se khareede hue aam aloo istemal nahin karne chahiye. Is ke bajaye, “Seed Potatoes” khareedein jo khas tor par ugane ke liye tayar kiye jaate hain. Yeh aloo bemariyon se paak hote hain aur in ki growth bhi achi hoti hai.

Note: Agar aap ke paas “Seed Potatoes” nahin hain to aap aam aloo se bhi beej bana sakte hain. Aloo ke beej banane ka tarika neeche bataya gaya hai.

3. Aloo Lagane Ke Liye Zameen Ki Tayari

Aloo ugane ke liye mitti ka naram aur zarkhez (fertile) hona zaroori hota hai. Aap ne apne garden ki mitti ko khod khod kar ya godi karke naram kar lena hai. Aap is mitti mein “Compost” ya “Manure” mila kar isay aur behtar bana sakte hain. Mitti jitni zyada zarkhez ho gi aloo ke poday itni hi zyada growth karen gay.

Aloo Ke Beej Banane Aur Lagane Ka Tarika

1. Aloo Ke Beej Banane Ka Tarika

Agar aap ke paas seed potatoes nahin hain to aap aam aloo se bhi beej bana sakte hain lekin is mein kuch ehtiyat zaroori hai. Aloo ka beej banane ka tarika yeh hai:

2. Sahi Aloo Ka Intekhab

Beej banane ke liye aise tamam aloo choose karein jo sehat mand hon aur un par kisi qism ki bemari waghera ka nishan na ho. Behtar ho ga ke aap darmiyaney size ke aloo select karen.

3. Ankhon (Eyes) Ki Pehchan

Har aloo par chote chote gadde hote hain in ko "ankhein" kehte hain. Yahi woh jagah hoti hai jahan se naya poda ugta hai. Aap ko aise aloo lene hain jin par kam se kam 2 se 3 ankhein hon. 

4. Aloo Ke Tukre Karna

Har aloo ke chhuri ke sath is tarah se tukre karein ke har tukre par kam se kam 2 ankhen zaroor hon. Har tukre ka wazan taqreeban 50 se 60 gram hona chahiye.

Note: Aloo ke tukre hi aloo ka beej hote hain. Is ka koi alag se beej nahin hota.

5. Tukron Ko Khuli Hawa Mein Sukhana

Tukre karne ke baad in ko thori dair ke liye khuli hawa mein rakhen taake un par ek sakht jild ban jaye. Is se woh mitti mein galen ge nahin aur bemariyon se bhi mehfooz rahen ge. Yeh amal bohot zaroori hai.

Aloo Ke Beej Lagane Ka Tarika

Beej banane ke baad agla kaam hai is beej ko zameen mein lagana. Aloo ke beej lagate waqt neeche batai hui baaton ka khyal rakhna hai. Aloo ka beej lagane ka tarika yeh hai:

1. Jaga (Space)

Aloo ke tukron ko mitti mein 6 se 8 inch tak gehra lagana hai. Har tukre ke darmiyan kam se kam 10 se 12 inch tak ka faasla rakhna hai. Aisa karne se podon ki nash-o-numa achi ho gi.

2. Sahi Rukh (Direction)

Aloo ke har tukre ko is tarah se lagana hai keh us ki "ankhein" oper ki taraf ko hon. Kyun keh jahan se hi naya poda nikalna hota hai.

3. Pani

Aloo ke beej lagane ke foran baad halka halka pani dena hai. Baad mein mitti ko sirf nam rakhna hai. Zyada pani nahin dena. Kyun keh is se aloo ke tukre gal sakte hain.

Aloo Ke Podon Ki Zaroori Dekh-Bhaal

Jab poday taqreeban 7 se 9 inch oonche ho jaen to un ke gird mazeed mitti daal dein. Is amal ko "Hilling" kehte hain. Yeh aloo ko suraj ki roshni se bachata hai aur mazeed aloo banne mein madad karta hai.

Aloo Ki Fasal Ki Katai Ka Sahi Waqt Aur Tarika

Aloo ki fasal taqreeban 70 se 100 din mein tayar ho jati hai. Jab podon ke patte peele ho kar sookh jaen aur girne lagein to samajh lein ke aloo nikaalne ka waqt aa gaya hai.

Aloo mitti se nikaalne ke liye “Kassi” ya “Belche” ka istemal karen aur ahtiyat se mitti se aloo bahir nikaalein. Is ke baad in ko dhoop mein kuch dair ke liye sookhne dein. Dhoop mein sukhane ke baad in ko store kar lein.

Ghar par ugaye hue aloo ka maza hi alag hota hai. Is aasan tareeqe par amal kar ke aap bhi apne baagiche se taza aur organic aloo haasil kar sakte hain.

Gajar (Carrot) Ugane Ka Tarika | Ghar Mein Taza Gajar Kaise Ugayen?