Thori Jagah Mein Zyada Poday Kaise Ugaye Ja Sakte Hain

Aaj ke dor mein aksar log shehron mein rehte hain jahan ghar chhotay chhotay hote hain. Aise gharon mein poday ugane ke liye jagah ya to hoti hi nahin ya phir bohat kam hoti hai.

Lekin agar aap thori si planning aur samajh dari se poday lagayen to thori si jagah mein bhi bohat se poday aasani se ugaye ja sakte hain.

Aaj hum aap ko thori ya kam jagah mein zyada poday ugane ka tarika batane ja rahe hain.

Thori Ya Kam Jagah Mein Zyada Poday Ugane Ka Tarika

1. Podon Ko Zameen Par Nahin Ugana

Sab se pehle zaroori baat yeh hai keh aap poday ugane ke liye “Vertical Gardening” ka tarika apnayein.

Is tareeqe mein poday zameen par rakhne ki bajaye deewar ke sath latkaye jate hain ya shelves par rakhe jate hain.

Is tareeqe mein poday ugane ke liye plastic ki bottles, wall pots aur “Hanging Baskets” waghera ko istemal kiya jata hai. Is tarah poday laga kar aap ek hi jagah mein bohat zyada poday laga sakte hain.

2. Sahi Podon Ka Intikhab Karna

Chhoti jagah ke liye sahi qisam ke podon ka intikhab bohat aham hota hai. Aap ne aise poday ugane ki koshish karni hai jo thori jagah mein aasani se growth kar saken.

Palak, dhania, podina, hara pyaz, mirch aur salad patta jaise poday kam jagah mein bhi achi growth kar lete hain. Inhein gehri mitti ki zaroorat nahin hoti. Yeh jaldi tayyar bhi ho jate hain. Aap ne is tarah ke poday lagane ki koshish karni hai.

3. Containers Ka Sahi Istemal Karna

Containers se murad aisay bartan ya dabay hote hain jin mein poday ugaye jate hain. Khaas tor par jab zameen ya jagah kam ho.

In mein plastic ke ghamlay, mitti ke pot, buckets, drums ya wooden boxes shamil ho sakte hain jin mein mitti bhar kar poday lagaye jate hain.

Thori jagah mein zyada poday ugane ke liye containers ka sahi istemal bhi bohat madadgar hota hai. Aaj kal “Growbags”, mitti ke ghamlay aur plastic ke dabay aasani se mil jate hain.

Ek hi container mein 2 ya 3 chhotay chhotay poday bhi lagaye ja sakte hain. Sirf is baat ka khayal rakhna hai keh pani nikalne ke liye neeche suraakh zaroor hon.

4. Podon Ke Liye Munasib Roshni Aur Hawa

Chhoti jagah mein poday ugate waqt roshni aur hawa ka khayal rakhna bohat zaroori hota hai.

Koshish karein keh poday kisi aisi jagah par hon jahan un ko rozana 4 se 6 ghantay dhoop mil sake. Agar direct dhoop na bhi milay to light shade bhi kaafi hoti hai.

5. Podon Ko Zyada Pani Nahin Dena

Pani dene mein bhi ehtiyat zaroori hai. Agar thori jagah mein zyada poday hon to pani zyada ruk sakta hai jis se jarrein kharab ho jati hain. Is liye sirf zaroorat ke mutabiq hi pani dein aur mitti ko zyada geela na rakhein.

Natija

Aakhir mein yeh hi kaha ja sakta hai keh thori ya kam jagah kabhi bhi poday ugane ke shoq mein rukawat nahin hoti. Bas poday ugane ka sahi tarika maloom hona chahiye.

Thori si samajh-dari ke sath aap apne ghar ke chhotay se hissay ko bhi khoobsurat aur hara-bhara bana sakte hain.