Aam (mango) ka poda lagana bilkul bhi mushkil nahin hai. Lekin lagane ke baad, aam ke poday ko bohat zyada dekh-baal ki zaroorat hoti hai.

Agar aap apne ghar, baagh ya khait mein aam ka poda lagana chahte hain to yeh article aap ki poori madad kare ga.

Aam Ka Poda Kab Lagana Chahiye?

Aam ka poda lagane ke liye 2 mosam behtar hote hain.

1. Bahar Ka Mosam (February se April)

In mahino mein mosam na to zyada garam hota hai aur na hi zyada thanda hota hai. Is liye in mahino mein naya poda aasani se lag jata hai.

2. Barsaat Ka Mosam (July se August)

Barsaat ke mosam mein aam ke poday ugane ki zaroorat bhi nahin parti yeh khud-bakhud ugne lagte hain. Jahan bhi aam ki guthli giri hui ho wahan aam ka poda ug jata hai.

Is mosam mein hawa mein nami hoti hai aur pani ki kami nahin hoti. Is liye is mosam mein aam ka poda bohat achhi growth karta hai.

Note: Shadeed sardi ke mosam mein aur shadeed garmi ke mosam mein aam ka poda lagane se parhez karein.

Aam Ka Poda Lagane Ke Liye Jagah Kesi Ho?

Aam ka darakht dhoop ko pasand karta hai. Is liye aisi jagah poda lagayen jahan rozana 6 se 8 ghante dhoop aati ho.
Poda ghar ki dewar se thora door lagayen taa ke jorron ko phailne mein mushkil na ho.
Jagah ki chorai (width) kam se kam 15 se 20 foot honi chahiye kyunke aam ka poda ek bara darakht banta hai.

Aam Ka Poda Lagane Ke Liye Mitti Kesi Honi Chahiye?

Aam ka poda halki, naram aur zarkhez mitti mein bohat achhi growth karta hai. Agar aap mitti ko behtar banana chahte hain to neeche bataye hue tareeqe ke mutabiq mitti ko tayyar kar sakte hain.

50% Mitti
25% Dariya ki rait (sand)
25% Gobar ki khaad ya organic compost

In teeno cheezon ka mixture poday ki jarron ko mazboot rakhta hai.

Aam Ka Poda Lagane Ka Tarika

1. Gaddha Tayyar Karein

Sab se pehle 2 × 2 foot ka ek gaddha khodein.
Gaddhe mein neeche thori si khaad aur mitti daal kar mix karein.

2. Poday Ko Gamlay Se Bahir Nikaalein

Ab poday ko gamlay ya pot se bahir nikaalein. Poday ki jarron (roots) ko tootne se bachana hai.

3. Poday Ko Gaddhe Mein Lagana

Poday ko gaddhe mein rakhein.
Ab poday ki jarron ke ird-gird gaddhe mein mitti daal dein.
Mitti daalne ke baad hath se halka halka mitti ko dabaen.
Mitti ko zyada zor se nahin dabana.

4. Pani Dena

Poday ke ird-gird mitti daalne ke baad pani dena hai taa ke mitti settle ho jaye.

Aam Ke Poday Ki Zaroori Dekh-Bhaal

1. Pani

Garmiyon mein 2 se 3 din ke baad pani dena hai.
Sardiyon mein 5 se 6 din ke baad pani dena hai.
Mitti ko hamesha halka halka geela rakhna hai.

2. Khaad

Aam ke poday ko khaad daalne ke liye March, April aur July, August ke mahine behtar hote hain.

Note: Aam ke poday ko gobar ki khaad, DAP khaad ya Organic Compost thori miqdar mein daal sakte hain.

3. Baar Lagana

Aam ke poday ko aksar janwar kha jate hain. Is liye aam ke poday ki hifazat ke liye poday ke ird-gird baar lagana bohat zaroori hota hai. Agar poda kisi mehfooz jagah par lagaya hua hai phir baar ki zaroorat nahin hai.

Keeron Aur Bemariyon Se Bachane Ka Tarika

Aam ke poday ko keeron aur bemariyon se bachane ke liye neeche bataye hue tareeqon par amal karein.

1. Neem Spray Karna

Har 10 se 15 din ke baad poday par neem oil spray karein.

Tarika:

1 liter pani mein 5ml neem oil milayen.
Subah ya sham ke waqt spray karein.
Spray patton ke oper aur neeche dono taraf honi chahiye.

2. Safai Lazmi Honi Chahiye

Bemar aur sookhe patte aur shaakhein kaat kar phenk dein.
Zameen par gire hue patton ko rozana saaf karein.

3. Zyada Pani Nahin Dena

Aam ke poday ko bohat zyada pani nahin dena.
Mitti mein pani jama na ho warna fungus lag jati hai.

4. Podon Ke Darmiyan Faasla Ho

Podon ko zyada qareeb qareeb nahin lagana.
Podon ke darmiyan hawa ka flow zaroori hai warna fungus lag jati hai.

5. Organic Khaad

Compost ya gobar ki khaad ka istemal karein.
Zyada chemical wali khaad ka istemal na karein.

6. Sabun Wale Pani Ki Spray

Agar aam ke poday par keeron ka hamla mamooli ho to sabun wale pani ki spray karein.

Tarika:

1 litre pani mein 1 chammach liquid sabun mila kar spray tayyar kar lein. Is spray ko hafte mein 1 dafa zaroor karein.

Aam Ka Poda Kitne Time Ke Baad Phal Dena Shuru Karta Hai?

Beej se ugaya hua aam ka poda 3 se 5 saal mein phal dena shuru kar deta hai. Aur grafting se tayyar kiya hua poda 2 se 3 saal mein phal dena shuru kar deta hai.

Ghaltiyan Jo Log Karte Hain

Yeh wo ghaltiyan hain jo log aam ka poda lagate waqt ya poda lagane ke baad karte hain.

Poday ko zyada pani dena.
Poday ko bilkul bhi hawa na lagne dena.
Poday ko saye (shade) mein lagana.
Poday ko zarkhez mitti mein na lagana.
Sardiyon mein naya poda lagana.

Aam ka poda lagana bilkul aasan hai. Bas sahi jagah, sahi mosam aur sahi dekh-bhaal ki zaroorat hoti hai. Agar aap oper bataye gaye steps par amal karein to aap ka aam ka poda bohat jaldi growth kare ga aur jaldi phal dena shuru kare ga.

Amrood Ka Poda Lagane Ka Tarika | Ghar Mein Amrood Ugana Seekhein