Gobar Ki Khaad Kya Hai? | Fayde, Nuqsanaat Aur Banane Ka Tarika

 

Gobar Ki Khaad Kya Hai?

Gaaye, bhains ya doosre janwaron ke gobar ke sookhne aur galne-sarne ke baad jo qudrati khaad banti hai us ko Gobar ki khaad kaha jata hai.

Saada alfaz mein, gaaye, bhains ya doosre janwaron ke gobar se tayyar ki jane wali khaad ko Gobar ki khaad kaha jata hai.

Gobar Ki Khaad Ke Fayde Kya Hain?

• Gobar ki khaad mitti ki zarkhezi mein izafa karti hai.
• Mitti mein pani rokne ki salahiyat paida karti hai.
• Gobar ki khaad podon ki jarron ko mazboot banati hai.
• Yeh khaad achay bacteria paida kar ke mitti ko sehatmand banati hai.
• Gobar ki khaad chemical wali khaadon (fertilizers) ke muqable mein mehfooz hoti hai.

Gobar Ki Khaad Ke Nuqsanaat Kya Hain?

Gobar ki khaad faidemand hoti hai lekin agar is khaad ko sahi tareeqe se istemal na kiya jaye to kuch nuqsanaat bhi ho sakte hain.

• Agar podon par taza gobar daal diya jaye to jarrein jal sakti hain.
• Taza gobar galne ke doran badboo paida karta hai aur agar safai na ho to keere-makore bhi lag sakte hain.
• Bohat zyada gobar ki khaad daalne se mitti ka pH badal sakta hai. Yeh kuch podon ke liye nuksan-deh saabit ho sakta hai.
• Agar gobar kisi beemar janwar ka ho to kuch bacteria ya germs podon aur mitti ko bhi affect kar sakte hain.

Gobar Ki Khaad Istemal Karne Ka Tarika Kya Hai?

• Beej bone se pehle gobar ki khaad ko mitti mein mila dein.
• Podon ke ird-gird halki miqdar mein daal sakte hain.
• Gobar ki khaad sabzi aur phalon ke baagh mein bohat mufeed saabit hoti hai.
• Hamesha sookhi hui khaad istemal karein.

Gobar Ki Khaad Banane Ka Tarika Kya Hai?

1. Khaad Banane Ke Liye Zaroori Cheezen

Gobar ki khaad banane ke liye aap ko in cheezon ki zaroorat pare gi.

• Taza gobar
• Sookhi pattiyan, ghaás ya bhoosa
• Thora sa pani
• Zameen par chhota gaddha ya drum

2. Gobar Ki Teh (Layer) Banana

• Neeche sookhi pattiyan ya bhoosa bichha dein.
• Us par gobar ki parat phaila dein.
• Phir thora sa pani chhirak dein.
• Isi tarah 3 se 4 layers tak bana lein.

3. Dhoop Aur Barish Se Mehfooz Rakhein

Is ko oper se mitti ya plastic ki sheet se dhak dein. Dhoop aur barish se mehfooz rakhne ki koshish karen.

4. Khaad Ko Palatna (Turning)

Har 7 se 10 din ke baad khaad ko palat dein. Aisa karne se hawa lagti rahe gi aur khaad jaldi tayyar ho jaye gi.

5. Khaad Tayyar Hone Ka Waqt

25 se 40 din mein gobar ki acchi khaad tayyar ho jati hai. Jab khaad ka rang gehra bhora aur is ki boo normal mitti jaisi ho jaye to aap ki khaad istemal ke liye tayyar hai.

Gobar ki khaad ek qudrati, mehfooz aur faidemand khaad hai. Is khaad ke sahi istemal se faslon aur baaghaat ki paidawar barhti hai aur zameen lambe arsey tak zarkhaiz rehti hai.

Urea Khaad Kya Hai? | Fayde Aur Nuqsanaat | Istemal Ka Tarika