Urea khaad Pakistan mein sab se zyada istemal ki jane wali
chemical khaad (fertilizer) hai. Is khaad mein 46% Nitrogen hoti hai jo podon
ki achi growth ke liye bohot zaroori mani jati hai.
Urea Khaad Kya Hai?
Urea ek safed aur danay-daar khaad hoti hai. Yeh Nitrogen
faraham karti hai. Yeh khaad podon ko hara-bhara kar deti hai. Yeh podon ke
patton ko mazboot karti hai aur podon ki growth ko tez karti hai. Nitrogen ke baghair
podon ki rangat peeli ho jati hai aur poday kamzor ho jate hain. Podon ke patte
bhi chhote reh jate hain.
Urea Khaad Ke Fayde Kya Hain?
1. Podon Ki Tez Growth
Urea khaad podon ko Nitrogen faraham karti hai jis se podon
ki growth bohot tez ho jati hai.
2. Podon Ko Hara Bhara Rakhti Hai
Agar podon ki rangat peeli ho rahi ho to urea khaad in ko dobara
hara kar deti hai.
3. Sasti Khaad Hai
Urea khaad Pakistan ke har ilaqe mein mil jati hai aur urea
khaad ki qeemat (price) bhi zyada nahin hoti. Yeh ek sasti khaad hai.
4. Zyada Phal Aur Paidawar
Nitrogen ki wajah se faslon ki paidawar mein izafa hota hai.
Urea khaad ke istemal se fasal ke phal mein numayan izafa hota hai.
Urea Khaad Ko Istemal Karne Ka Tarika
1. Mitti Mein Milana
Urea khaad ko hamesha mitti mein mila kar daalna chahiye taa
ke khaad mein mojood Nitrogen hawa mein na ure.
2. Pani Dena Zaroori Hota Hai
Urea khaad daalne ke baad zameen ko pani dena bohot zaroori
hota hai. Pani na dene ki wajah se poday jal bhi sakte hain.
3. Zyada Urea Khaad Ka Nuqsan
Agar urea khaad zyada daal di jaye to fayde ki jagah nuqsan bhi
ho sakta hai. Zyada urea khaad ki wajah se poday jal sakte hain.
4. Mosam Ka Khayal Rakhna
Garmiyon ke dino mein doop mein urea khaad daalne se nitrogen hawa mein ur jati hai. Is liye garmiyon mein subah ya sham ke waqt urea khaad daalna behtar hota hai.
Urea Khaad Kab Daalni Chahiye?
- Beej se poda nikalne ke waqt (planting time).
- Phool ya phal lagne se pehle.
- Jab poday peele par rahe hon.
- Jab podon ki growth ruk rahi ho
Urea Khaad Kin Faslon Ke Liye Behtar Hoti Hai?
1. Gandum (Wheat)
2. Chawal
3. Makai (Corn)
4. Ganna (Sugarcane)
5. Sabziyan (Vegetables)
Khaas tor par:
- Palak
- Saag
- Bandgobi
- Methi
- Hara Dhaniya
- Hara Piyaz
- Mirch
- Tamatar (limited amount)
7. Phal-Daar Darakht (Limited Use)
Kin Faslon Mein Urea Khaad Kam Istemal Hoti Hai?
- Daalein (Moong, Mash, Masoor)
- Aloo
- Piyaz
Urea Khaad Ke Nuqsanaat Kya Hain?
1. Mitti Ki Quality Kam Ho Jati Hai
Zyada urea khaad daalne se mitti mein Nitrogen ki miqdar
zyada hone ki wajah se mitti ki quality kam hoti jati hai.
2. Podon Ke Jalne Ka Khatra
Urea khaad ke direct podon ki pattiyon par parhne se ya zyada
miqdar mein urea khaad daalne se podon ke jalne ka khatra paida ho jata hai.
3. Pani Ki Zaroorat Barh Jati Hai
Urea khaad daalne ke baad pani dena zaroori hota hai. Pani na
dene ki soorat mein podon ko nuqsan pohanch sakta hai.
4. Mahol (Environment) Ko Nuqsan
Hawa mein nitrogen ke urne se maholiyati aloodgi mein bhi izafa hota hai.
Tip: Urea khaad ko 15 din ke gap se istemal karein.
0 Comments