Gandum Se Jari Booti Khatam Karne Ka Tarika

Pakistan mein gandum (wheat) ek bunyadi fasal hai. Lekin mukhtalif iqsam ki jari bootiyan (weeds) gandum ki paidawar ko kam karne ki bari wajah banti hain.

Is article mein hum gandum se jari booti khatam karne ke tareeqe roman Urdu mein batane ja rahe hain.

Jari Booti Kya Hoti Hai?

Wo ghair-zaroori poday jo gandum ke sath khud-ba-khud ug aate hain un ko jari booti kaha jata hai.

Jari Booti Khatam Na Karne Ke Nuqsanaat Kya Hain?

Is se gandum ki growth ruk jati hai.
Jari booti se paidawar 20 se 40% tak kam ho sakti hai.
Jari booti se bemariyon aur keeron ko barhawa milta hai.
Gandum ke dane kam aur kamzor hote hain.
Fasal dair se pakti hai.
Kisan ko zyada kharcha bardasht karna parta hai.

Gandum Mein Payi Jane Wali Aam Jari Bootiyan

Pakistan mein gandum ki fasal mein zyada tar yeh jari bootiyan hoti hain.

Baathu (Chenopodium)
Jangli Jai
Dumbi Sitti
Fumaria
Jangli Palak

Gandum Se Jari Booti Khatam Karne Ka Tarika

1. Zameen Ki Tayari

Beej bonay se pehle zameen ko achi tarah hal chala kar barabar karein. Pehla pani de kar jari booti ko ugne dein. Phir hal chala kar is ko khatam kar dein.

2. Saaf Suthra Beej Istemal Karein

Gandum ugane ke liye hamesha certified aur saaf beej istemal karein. Zyadar tar log ghar ka rakha hua beej istemal karte hain. Ghar ke rakhe hue beej mein aksar jari booti ke beej bhi shamil hote hain.

3. Hath Se Jari Booti Ko Nikaalna

Jari booti ko hath se bhi nikala ja sakta hai. Gandum ugne ke 20 se 30 din ke baad hath ya rambi se jari booti nikaal dein. Yeh tarika kam zameen ke liye zyada mufeed hai.

4. Jari Booti Khatam Karne Wali Dawai Ka Istemal

Agar jari booti zyada ho to phir jari booti khatam karne wali dawaiyon “Herbicides” ka istemal karna behtar rehta hai. Dawai gandum mein mojood jari booti ke mutabiq istemal ki jati hai.

Patli Patli Jari Booti Ke Liye

Isoproturon
Clodinafop

Choray Patton Wali Jari Booti Ke Liye

Bromoxynil
MCPA

Spray Karne Ka Behtareen Waqt

Spray karne ka behtareen waqt gandum ugne ke 25 se 35 din ke baad hota hai. Yeh wo waqt hota hai jab jari booti abhi choti hoti hai.

Ahm Ehtiyaat

Spray hamesha us waqt karein jab hawa kam ho.
Zyada dawa fasal ko nuqsan de sakti hai.
Hamesha zaraat ke mahireen ke mashware se dawa ka istemal karein.

5. Badal Badal Kar Fasal Ugana (Crop Rotation)

“Crop Rotation” ka matlab hota hai keh har saal ek hi khait mein ek hi fasal na ugai jaye. Faslon ko badal badal kar ugaya jaye.

Fasal ko badal badal kar ugane se bhi jari bootiyon ka masla kam ho jata hai. Har saal sirf gandum hi na ugayein.

Har saal sirf gandum hi ugane se jari booti zyada ho jati hai aur zameen bhi kamzor ho jati hai.

Is maslay se bachne ke liye gandum ke baad channa, sarson ya makai ugayein. Is tarah jari booti khud-ba-khud kam ho jati hai aur fasal bhi achi hoti hai.

Gandum se jari booti khatam karna achhi paidawar ke liye bohat zaroori hota hai. Agar zameen ki tayari, bar waqt godi aur zaroorat par Herbicides ka sahi istemal kiya jaye to jari bootiyon par aasani se qaboo paya ja sakta hai.

Gobar Ki Khaad Kya Hai? | Fayde, Nuqsanaat Aur Banane Ka Tarika