Kheera Kya Hota Hai?

Kheere ko English mein “Cucumber” kaha jata hai. Kheera ek mashhoor sabzi hai jo zyada tar garmiyon ke mosam mein khai jati hai. Kheere ko sab se zyada salad mein istemal kiya jata hai.

Yeh sirf tazgi aur pani ka behtareen zariya nahin hai balki sehat ke liye bhi bohat faidemand hai. Kheere mein vitamins, minerals aur hydration ki achhi miqdaar mojood hoti hai.

Aaj aap roman Urdu mein kheere ugane ka tarika parhein gay.

Kheera Ugane Ka Step by Step Tarika

Kheere ugane ke liye yahan kuch aasan steps bataye ja rahe hain. In steps par amal kar ke aap aasani ke sath apne ghar ya kisi bhi doosri jagah par taza kheere uga saken gay.

Kheere Ugane Ke Liye Behtareen Mosam Aur Waqt

Kheera buniyadi tor par garmiyon ki sabzi hai. Is ko ugane ke liye dhoop aur thori tapish ki zaroorat hoti hai.

1. Behtareen Waqt

February se le kar April tak aur phir July se August tak kheere ugane ka sab se acha waqt hota hai.

2. Behtareen Mosam

Kheere ke podon ya bail ko rozana kam-az-kam 6 se 8 ghante ki dhoop ki zaroorat hoti hai.

Kheere Ugane Ke Liye Beej Ka Intikhab

Kheere ugane ke liye hamesha achi quality ke "Hybrid" ya "Desi" beej istemal karein. Is se paidawar achi hoti hai.

Beej bone se pehle unhein 4 se 5 ghante tak pani mein bhigo kar rakhein. Is se beej jaldi ugte hain.

Note: Aap kheere ke beejon ko seedha gamlay mein ya zameen mein laga sakte hain.

Kheere Ugane Ke Liye Mitti Kis Tarah Ki Ho?

Kheere ugane ke liye mitti narm aur zarkhaiz honi chahiye. Is mein pani jama na hota ho.

Mitti tayyar karne ka formula:

50% mitti (Garden soil)
30% Gobar ki khad (Compost)
20% Rait (Sand)

In sab ko mila kar mixture tayyar kar lein.

Note: Agar aap gamlay mein uga rahe hain to kam-az-kam 12 se 14 inch ka gamla istemal karein.

Kheere Ke Beej Bone Ka Sahi Tarika

Sab se pehle mitti tayyar karein. Mitti naram aur saaf honi chahiye. Beej lagane se pehle mitti ko thora sa geela kar lein taake beej aasani se ug sakein.

Ab ek lakri ki madad se mitti mein taqreeban 1 inch gehre chhote chhote gaddhay bana lein. Har gaddhay mein 2 ya 3 kheere ke beej daal dein. Aisa is liye kiya jata hai ke agar koi ek beej na uge to doosra beej ug aaye.

Beej lagane ke baad unhein halki halki mitti se dhaanp dein. Zyada mitti na daalein warna beej ko ugne mein mushkil ho sakti hai.

Aakhir mein halka halka sa pani de dein. Itna pani kafi ho ga ke mitti geeli rahe aur pani jama bhi na ho. Rozana mitti check karte rahein aur jab bhi mitti sookhi lage to thora sa pani dete rahein.

Kheere Ke Beejon Se Poday Kitne Din Baad Nikal Aate Hain?

Kheere ke beejon se taqreeban 5 se 7 din mein chote chote poday nikalna shuru ho jate hain.

Zaroori Dekh-Bhaal

Kheere ki bail (vine) tezi se phailti hai. Is liye ise tawajjo ki zaroorat hoti hai.

1. Pani

Mitti ko hamesha nam (moist) rakhna hai lekin keechar bhi nahin banne dena. Garmiyon mein rozana subah ya sham ke waqt pani dena hai.

2. Sahara (Support)

Kheere ki ek bail hoti hai. Jab poda 1 foot ka ho jaye to ise kisi lakri, rassi ya jaal (trellis) ka sahara dein taake bail oper charh sake. Is se phal mitti se door rehta hai aur kharab nahin hota.

3. Khad

Har 15 se 20 din ke baad thori si Gobar ki khad ya Liquid fertilizer (N-P-K) daalni hai.

4. Bemariyon Aur Keeron Se Hifazat

Kheeron par aksar safaid powder (Powdery Mildew) ya keeray hamla karte hain. In se bachne ke liye Neem Oil ki spray har 15 din ke baad karte rahein.

Kheere Kitne Din Ke Baad Tayyar Ho Jate Hain?

Beej lagane ke taqreeban 50 se 60 din ke baad kheere bail se utarne ke liye tayyar ho jate hain.

Note: Kheeron ko zyada bare na hone dein, kyun ki zyada bare kheere karway ho sakte hain aur un mein beej sakht ho jate hain.

Kheere ugana mushkil kaam nahin hai. Agar aap sahi waqt, achi mitti, munasib pani aur thori si dekh-bhaal ka khayal rakhein to aap aasani se ghar par hi taza kheere uga sakte hain.

Shimla Mirch Ghar Par Ugane Ka Tarika | Capsicum Growing Guide