Shimla mirch ko English mein Capsicum ya Bell Pepper kaha jata hai. Shimla mirch ko Pakistan mein bohat shoq se khaya jata hai. Yeh apni rangat, khushboo aur zaiqe ki waja se har ghar mein pasand ki jati hai.

Agar aap shimla mirch ko bazar se khareedne ki bajaye ghar par hi ugana chahte hain to yeh kaam bilkul bhi mushkil nahin hai. Wo log jo pehle se hi poday waghera ugate rehte hain un ke liye to yeh bilkul aasan hai.

Is article mein hum aap ko shimla mirch ugane ka mukammal tarika aap ki apni zuban Urdu mein tafseel se batayen gay.

Shimla Mirch Ugane Ke Liye Zaroori Cheezein

1. Shimla Mirch Ke Beej

Shimla mirch ugane ke liye, sab se pehle, aap ke paas shimla mirch ke beej hone chahiye. Yeh beej kisi bhi nursery ya beej ki dukan se khareede ja sakte hain. Market mein shimla mirch ke mukhtalif rangon (hara, peela, laal) ke beej dastiyaab (available) hote hain. Aap apni pasand ke mutabiq beej choose kar sakte hain.

2. Shimla Mirch Ke Podon Ki Paneeri

Shimla mirch ke beejon ko direct zameen mein bone ki bajaye, pehle podon ki paneeri tayar ki jati hai. Paneeri tayar karna behtar hota hai. Is se poday mazboot bante hain aur un ke survive karne ke chances zyada hote hain.

Shimla Mirch Ki Paneeri Tayar Karne Ka Tarika

Shimla mirch ki paneeri tayar karne ke liye chote size ke gamle lein. In mein achi quality ki saaf aur zarkhez mitti bharein. Aap paneeri tayar karne ke liye “Seed Tray” bhi istemal kar sakte hain.

1. Beej Lagana

Har gamle mein 1 ya 2 beej halkay hath se lagayein aur phir oper thori thori si mitti daal dein. Beejon ko mitti mein zyada gehra nahin lagana.

2. Pani Dena

Beejon ko lagane ke baad halka halka pani dein. Mitti ko hamesha num rakhein. Lekin zyada pani bhi nahin dene. Is se beej kharab ho sakte hain.

3. Garmi Aur Roshni Wali Jagah

In gamlon ko kisi garam aur roshni wali jagah par rakhna hai. Taqreeban 7 se 14 dinon mein beejon se poday nikalna shuru ho jayen ge.

Shimla Mirch Ke Podon Ki Paneeri Lagane Ka Tarika

Jab poday 4 se 6 inch tak lambay ho jayen aur har poday par 2 se 3 patte bhi nikal ayen to aap ki shimla mirch ki paneeri lagane ke liye tayar hai.

Shimla Mirch Ke Podon Ke Liye Sahi Jagah

Shimla mirch ke podon ke liye dhoop wali jagah achi hoti hai. Shimla mirch ke podon ko lagane ke liye kisi aisi jagah ko select karein jahan kam az kam 6 se 8 ghantay ki seedhi dhoop atti ho.

Zameen Ki Tayari

Jis jagah par shimla mirch ke podon ki paneeri lagani ho, us jagah ki zameen ko achi tarah se naram karein. Zameen mein gobar ki khaad ya koi aur organic khaad milana podon ki growth ke liye behtar hai.

Podon Ke Darmiyan Fasla (Distance)

Podon ke darmiyan kam az kam 18 se 24 inch tak ka fasla rakhein. Is se podon ko barhne aur phailne ke liye munasib jagah mile gi. Is se podon par lagne wala phal bhi achi growth kare ga.

Podon Ko Ek Jagah Se Doosri Jagah Lagane Ka Tarika

Podon ko “Seed Tray” ya gamlon se ahista se nikaalein. Is baat ka khayal rakhein ke podon ki jarren (roots) damage na hon. Tayar ki hui zameen mein chote chote garhe (pits) khod kar podon ko un garhon mein lagayein aur oper se mitti daal kar halkay hath se daba dein. Pode lagane ke foran baad halka halka pani dein.

Shimla Mirch Ke Podon Ki Zaroori Dekh-Bhaal

1. Pani Dena Kab Dena Hai?

Shimla mirch ke podon ko regularly pani ki zaroorat hoti hai. Khas tor par garmiyon ke mosam mein to rozana pani dena hota hai. Mitti ko hamesha num rakhna hai. Lekin pani ko jama nahin hone dena kyunke is se jarren sar sakti hain.

2. Kya Shimla Mirch Ko Khaad Ki Zaroorat Hoti Hai?

Shimla mirch ke podon ko lagane ke 2 se 3 hafton ke baad aap organic khaad de sakte hain. Aap gobar ki khaad ya phir liquid fertilizer bhi istemal kar sakte hain. Har 2 se 3 hafton ke baad khaad dena se podon ki growth achi ho gi.

Ghaas Aur Jari-Booti Ko Khatam Karna

Podon ke gird se fazol ghaas (weeds) ko nikaalte rehna hai. Is tarah ka ghaas aur jari booti podon ki ghaza (nutrients) aur pani mein shareek hote hain.

Podon Ko Sahara Dena

Jab pode baray hone lagen aur khas kar jab podon par phal (shimla mirch) lagna shuru ho jaye to un ko sahara dene ki zaroorat hoti hai. Aap sahara dene ke liye lakri ki chharian ya koi aur cheez istemal kar sakte hain. Sahara na dene se poday phalon ke bojh se toot bhi sakte hain.

Keeray Makoray Aur Bemariyan

Shimla mirch ke podon par keeray makoron aur bemariyon ka hamla bhi ho sakta hai. Is se bachne ke liye aap “Neem Oil” ya kisi aur safe insecticide ka istemal kar sakte hain.

Note: Agar poday ke kisi hisse par koi bemari nazar aye to foran us hisse ko kaat kar alag kar dein.

Shimla Mirch Ki Katai Ka Sahi Waqt Aur Tarika

Jab shimla mirch ka phal apni asal rangat (color) mein aa jaye aur mirchon ka size bhi munasib ho jaye to yeh katai ka sahi waqt hota hai. Misaal ke tor par, agar aap ne peele rang ki mirchon ka beej lagaya hai to jab mirchon ka rang peela ho jaye aur mirchon ka size bhi munasib ho jaye to aap mirchon ko tor sakte hain.

Mirchon ko kaatne ke liye tez chhuri ya qainchi istemal karein. Phal ko dandi (stem) ke sath kaat lena hai.

Tamatar Ugane Ka Tarika Aur Zaroori Maloomat