Hum ek poda (plant) ugate hain. Poda bilkul sehatmand aur hara-bhara hota hai. Poda growth bhi achi karta hai. Lekin phir achanak poday ke pattay peele hona shuru ho jate hain. Poda bemar lagna shuru ho jata hai. Bil-aakhir poda sookh jata hai.

Poda Kyun Sookh Jata Hai?

Is ki kya wajuhaat hain? Aaj hum aap ko kuch aisi ghaltiyon ke mutaliq batane ja rahe hain jo hum poday ki dekh-bhaal ke doran karte hain. Hamari in choti choti ghaltiyon ki wajah se ek sehatmand poda bhi sookhne lagta hai.

Poday Ki Dekh-Bhaal Ke Doran Hone Wali Ghaltian

Is mazmoon ko shuru se le kar aakhir tak parhein. Kahin aap bhi in mein se koi ghalti to nahin kar rahe?

1. Poday Ko Zyada Pani Dena

Zyada tar log jab koi poda ugate hain to us ko din bhar pani dete rehte hain. Yeh ek ghalat aadat hai. Har poday ki pani ki zaroorat alag hoti hai.

Kisi poday ko zyada pani ki zaroorat hoti hai aur kisi ko kam. Har poday ko us ki zaroorat ke mutabiq pani dena chahiye. Agar poday ko us ki zaroorat se zyada pani diya jaye to poda sookh jata hai.

2. Poday Ko Zyada Khaad Daalna

Doosri bari ghalti jo hum karte hain wo hai poday ko zyada khaad daalna. Kuch log poday ki achi aur tez growth ke liye zyada khaad ka istemal karte hain. Aise nahin karna chahiye.

Zyada khaad daalne se bhi poday ko nuqsan pohanch sakta hai. Pani ki tarah har poday ki khaad ki zaroorat bhi mukhtalif hoti hai. Kuch poday aise bhi hote hain jin ko khaad ki zaroorat nahin hoti.

Har poday ko us ki zaroorat ke mutabiq khaad daalni chahiye. Khaad ka zyada istemal karne se parhez karna chahiye.

3. Jari-Booti Ko Khatam Na Karna

Jis jagah par poda ugaya ho ya kiyari mein poday ke sath ghair-zaroori poday ugna shuru ho jate hain. In podon ko Jari-Booti kaha jata hai.

Is jari-booti ko agar khatam na kiya jaye to poday ki growth par bura asar parta hai. Is jari-booti ki wajah se poday ko khorak kam milti hai. Jis ki wajah se poday ki growth ruk jati hai ya ahista ho jati hai.

Kuch log in ghair-zaroori podon ko nazar-andaz kar dete hain. Magar is jari-booti ko khatam kar dena chahiye.

4. Kiyari Mein Gali Sari Cheezen Phainkna

Aap ne dekha ho ga ke aksar log kitchen ka bacha hua khana ya gali-sari cheezen podon ki kiyari mein phaink dete hain. Kuch logon ka khayal hai ke yeh cheezen podon ke liye khaad ka kaam karti hain.

Magar har gali-sari cheez podon ke liye mufeed nahin hoti. Yeh gali-sari cheezen baaz-auqaat khaad ka kaam karne ki bajaye podon ke liye zehar ka kaam karti hain. In cheezon ki wajah se mitti mein badboo paida ho sakti hai aur keeray makoray bhi paida ho jate hain. Aisi cheezon ko kiyari mein phainkne se guraiz karna chahiye.

5. Poday Ko Ghalat Jagah Par Lagana

Sirf chand podon ke ilawa, har poday ko dhoop ki zaroorat hoti hai. Jab hum poday ko kisi aisi jagah par laga dete hain jahan poday ko us ki zaroorat ke mutabiq dhoop nahin milti to poday ki growth ruk jati hai.

Podon ki growth ka inhisaar dhoop par bohat zyada hota hai. Poday ki achi aur tez growth ke liye us ko aisi jagah par lagana chahiye jahan par use us ki zaroorat ke mutabiq dhoop mil sake.

6. Poday Ki Dekh-Bhaal Na Karna

Aksar log poda ugane ke baad us par tawajjo dena kam kar dete hain. Har poday ko munasib dekh-bhaal ki zaroorat hoti hai. Agar poday ki munasib dekh-bhaal na ki jaye to poda sookh sakta hai.

Natija:

Poda bhi ek jandaar cheez hai. Jis tarah doosri jandaar cheezon ko dekh-bhaal aur tawajjo ki zaroorat hoti hai, isi tarah poday ko bhi munasib dekh-bhaal ki zaroorat hoti hai.

Agar poday ko us ki zaroorat ke mutabiq pani, dhoop aur mahol diya jaye to poda sehatmand aur hara-bhara rehta hai. Poday ko sookhne se bachane ke liye oper batai hui ghaltiyon se bachna bohat zaroori hai.

Thori Jagah Mein Zyada Poday Kaise Ugaye Ja Sakte Hain?